ខេត្តកណ្តាល ÷ ប្រិយមិត្តជាទីរាប់អាន ដូចដែលមហាជនក្នុងនិងក្រៅប្រទេស បច្ចុប្បន្នប្រទេសកម្ពុជាកំពុងតែទទួលរងនូវការ ឈ្លានពានពីចោរសៀម ដែលបានប្រើល្បិចកិច្ចកលគ្រប់មធ្យោបាយ ដើម្បីលេបត្របាក់ទឹកដីកម្ពុជា បណ្តាស្ថាប័នពាក់ព័ន្ធ និងថ្នាក់ដឹងនាំគ្រប់លំដាប់ថ្នាក់ ពិសេសសម្តេច តេជោ ហ៊ុនសែន និងសម្តេចធិបតី ហ៊ុន ម៉ាណែត ដែលជាបិតាសន្តិភាព បានរិះរកគ្រប់មធ្យោបាយទប់ស្កាត់ពីចោរឈ្លានពាននោះឲ្យខានតែបាន ដើម្បីសុខសុវត្ថិភាពដល់ប្រជាជនខ្មែរគ្រប់រូប និងប្រទេសជាតិទាំងមូល។ដោយឡែកងាកមកមើលនៅស្រុកអង្គស្នួលឯណេះវិញ ល្បែងសុីសងតាមប្រព័ន្ធអនឡាញ ជាច្រើនកន្លែងនៅតែបើកដំណើរការលេងយ៉ាងពេញបន្ទុកក្នុងភូមិត្រើយបឹង ឃុំព្រៃពួក ស្រុកអង្គស្នួល ខេត្តកណ្តាល ខណៈអាជ្ញាធរក្នុងមូលដ្ឋានរក្សាភាពស្ងៀមស្ងាត់ដូចគេញ៉ុកមាត់ បើទោះបីជាមានបទបញ្ជាពីប្រមុខថ្នាក់ដឹកនាំ ឲ្យអភិបាលរាជធានី-ខេត្ត ទូទាំងប្រទេសធ្វើការទប់ស្កាត់ និងបិទឲ្យអស់រាល់ល្បែងសុីសង ទាំងលេងផ្ទាល់ និងតាមប្រព័ន្ធអនឡាញ ដែលមាននៅក្នុងដែនសមត្ថកិច្ចរបស់ខ្លួន ឲ្យខានតែបាន។គួររំលឹកផងដែរថានៅថ្ងៃទី១០ ខែវិច្ឆិកា ឆ្នាំ២០២៤ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បានចេញសេចក្តីប្រកាស អោយអភិបាលរាជធានី ខេត្ត ក្រុងទូទាំងប្រទេស ត្រូវបិទទាំងស្រុងរាល់ល្បែងស៊ីសងសងគ្រប់ប្រភេទ មិនថាលេងផ្ទាល់ រឺលេងតាមប្រព័ន្ធអនឡាញ។ជាក់ស្តែងនៅថ្ងៃទី០១ ខែតុលា ឆ្នាំ២០២៥នេះ គេសង្កេតឃើញថាទីតាំងល្បែងសុីសងអនឡាញនៅចំណុចភូមិសាស្ត្រខាងលើ កំពុងតែពង្វក់ស្មារតីក្រុមអ្នកញៀនល្បែងអោយឆ្កួតវង្វេងភ្លេចគិតពីកំរិតជីវភាពគ្រួសារក្រលំបាក ខ្លះជំពាក់គេវ័ណ្ឌក ខ្លះអស់ម៉ូតូ និងខ្លះទៀតហ៊ានប្រើប្រាស់អំពើហិង្សាក្នុងគ្រួសារ ឈ្លោះប្រកែកទាស់ទែងវាយប្រពន្ធកូនក៏មាន ។ ទោះជាយ៉ាងនេះក្តីប្រជាពលរដ្ឋក្នុងមូលដ្ឋាន សំណូមពរទៅដល់លោកវីរសេនីឯក មាន សំណាង អធិការស្រុកអង្គស្នួល និងលោកឧត្ដមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល មេត្តាទានមានវិធានការណ៍ ចាត់កម្លាំងក្រោមឱវាទចុះទប់ស្កាត់ និងបង្ក្រាបរាល់ល្បែងសុីសង នៅចំណុចទីតាំងខាងលើនេះផងទាន! សូមអរគុណ។
