ខេត្តក្រចេះ ÷ ប្រិយមិត្តជាទីរាប់អាន! ប៉ុន្មានឆ្នាំក្រោយមកនេះមហាជនទូទាំងប្រទេសបានសង្កេតឃើញថា ខេត្តក្រចេះគឺជាខេត្តមួយ ដែលល្បីខ្ទរខ្ទារ និងឈានមុខគេ ពាក់ព័ន្ធនិងទៅនិងបទល្មើសធនធានធម្មជាតិ ដែលបានបង្ករឡើងដោយក្រុមឈ្មួញល្បីៗជាច្រើនរូប និងមានឈ្មោះបោះសំឡេងលេចធ្លោជាងគេទូទាំងប្រទេស ពិសេសគឺឈ្មោះ ស្រីមុំ នេះតែម្តង។ដោយកន្លងមកស្ត្រីជើងខ្លាំងរូបនេះ បានធ្វើសកម្មភាពដឹកជញ្ជូនផលអនុផលព្រៃឈើ ដែលជាសម្បត្តិរបស់រដ្ឋ ដូចជា ឈើ+ក្តារ ធ្យូង និងអុសព្រៃឆ្លងដែនយកទៅលក់នៅតាមបណ្តាដេប៉ូនានាទូទាំងប្រទេស និងឆ្លងដែនយកទៅលក់នៅប្រទេសវៀតណាមបានយ៉ាងរលូនជាទីបំផុត ដោយពុំឃើញមានការទប់ស្កាត់ពីសំណាក់សមត្ថកិច្ច មន្ត្រីជំនាញពាក់ព័ន្ធណាចុះធ្វើការទប់ស្កាត់ និងបង្ក្រាបទាល់តែសោះ។ប៉ុន្តែស្រាប់តែនៅថ្ងៃទី១៣ ខែកញ្ញា ឆ្នាំ២០២៥ លោក តាន់ គីមសួរ ប្រធានសមាគមយុវជនស្រលាញ់ធម្មជាតិ បានប្រទះឃើញរថយន្តសាំងយ៉ុងកែឆ្នៃចំនួន ០២គ្រឿង ផ្ទុកពេញដោយអុសព្រៃពេញៗរថយន្តនៅចំណុចចំការចេក ឃុំឃ្សឹម ស្រុកស្នួល ខេត្តក្រចេះ ដែលគេស្គាល់ថាជារបសើឈ្មួញឈ្មោះ ស្រីមុំ បម្រុងដឹកចេញទៅប្រទេសវៀតណាម តាមច្រកដេ១៦ រឺងាំ១៦ ក្នុងឃុំក្រញូងសែនជ័យ ភ្លាមនោះលោក តាន់ គីមសួរ ក៏បានរាយការណ៍ទៅលោក ភោគ សុជោត នាយដែនជម្រកសត្វព្រៃកែវសីមា-ក្រចេះ ដោយមានការសម្របសម្រួលពីឯកឧត្តម គឺ ប៊ុណ្ណារ៉ា ព្រះរាជអាជ្ញាខេត្តក្រចេះ និងលោក សាំ ណាល់ អភិបាលស្រុកស្នូល បានបញ្ជារមន្ត្រីជំនាញចុះមកទប់ស្កាត់និងបង្ក្រាបរថយន្តទាំង០២ខាងលើ តាំងពីម៉ោង ២:៣០ នាទីរសៀល រហូតដល់ម៉ោង៦ល្ងាចទើបមន្ត្រីជំនាញបរិស្ថានមកដល់ ដែលជាហេតុធ្វើឲ្យក្រុមឈ្មួញមានឱកាសទម្លាក់អុសចោលពាសវាលពាសកាលរួចបើករថយន្តគេចខ្លួនបានដោយសុវត្ថិភាព។ជុំវិញករណីខាងលើនេះ ប្រជាសហគមន៍ទូទាំងប្រទេស ហាក់មិនអស់ចិត្តទៅលើមន្តី្រជំនាញពិសេសជំនាញបរិស្ថាន ដែលមានលោក ភោគ សុជោត ជានាយដែន ហេតុអ្វីបានជាបណ្តែតបណ្ដោយឱ្យមានបទល្មើសក្នុងដែនសមត្ថកិច្ចខ្លួនគ្រប់គ្រងបែបនេះទៅវិញទាន? ព្រោះថាសកម្មភាពដឹកជញ្ជូនអុសព្រៃរបស់ឈ្មួញឈ្មោះ ចែមុំរូបនេះមិនមែនមានតែ១ថ្ងៃនោះទេ ពោលគឺដឹកជារៀងរាល់ថ្ងៃតែម្តង ប្រជាពលរដ្ឋបន្ថែមថា ប្រសិនបើគ្មានការបើកដៃពីសមត្ថកិច្ច មន្ត្រីជំនាញនោះ ម្លោះបទល្មើសក៏គ្មាននោះដែរ!។ ម្យ៉ាងទៀតប្រជាពលរដ្ឋដែលស្រឡាញ់ធនធានធម្មជាតិទូទាំងប្រទេស រង់ចាំគាត់មើលថាតើ ឈ្មួញដែលល្បីឈ្មោះប្រចាំខេត្តក្រចេះ ឈ្មោះ ស្រីមុំ រូបនេះ អាចគេចផុតពីសំណាញ់ច្បាប់បានដែរឬទេ?ទោះជាយ៉ាងនេះក្តីប្រជាពលរដ្ឋនិងមហាជន ទទូចស្នើសុំទៅដល់អាជ្ញាធរមានសមត្ថកិច្ច ពិសេសឯកឧត្តម វ៉ា ថន អភិបាលខេត្តក្រចេះ និងឯកឧត្តម គឺ ប៊ុណ្ណារ៉ា ព្រះរាជអាជ្ញាអយ្យការអមសាលាដំបូងខេត្តក្រចេះ មេត្តាទាន មានវិធានការចាត់កម្លាំងក្រោមឱវាទ ចុះធ្វើអធិការកិច្ច ចំពោះឈ្មួញដែលតែងតែធ្វើសកម្មភាពដឹកជញ្ជូនផលអនុផលធនធានធម្មជាតិ ឈ្មោះ ស្រីមុំ ខាងលើនេះ ចាត់ការតាមផ្លូវច្បាប់ផងទាន សូមអរគុណ៕
