ខេត្តក្រចេះ ÷ ប្រិយមិត្តជាទីរាប់អាន លោក មៀច ពៅ និងអ្នកស្រី ខុន ស្រីណាត រស់នៅភូមិស្វាយចេក ឃុំកោះខ្ញែរ ស្រុកសំបូរ ខេត្តក្រចេះ ត្រូវជាឪពុកម្តាយសព្វជនរងគ្រោះបានលើកឡើងថា អស់រយៈពេលជាង១០ខែទៅហើយ ដែលពួកគាត់នៅពុំទាន់ទទួលបានការដោះស្រាយនិងយុត្តិធម៌នៅឡើយទេ ខណៈកូនប្រុសស្រីរបស់គាត់ត្រូវបានស្លាប់បាត់បង់ជីវិត កាលពីចុងឆ្នាំ២០២៤កន្លងទៅ។គួររំលឹកផងដែរថាកាលពីថ្ងៃទី២០ ខែវិច្ឆិកា ឆ្នាំ២០២៤ មានករណីគ្រោះថ្នាក់ចរាចរណ៍មួយបង្កឡើងដោយរថយន្តកូរ៉េដឹកទំនិញ ០១គ្រឿងម៉ាក JAC ពណ៌ស ពាក់ស្លាកលេខ ភ្នំពេញ 3F-9358 បានបុកម៉ូតូ ០១គ្រឿងម៉ាកវ៉េវ ពណ៌ស ជិះពីរនាក់ប្តីប្រពន្ធ ចំពីមុខនៅចំណុចភូមិទ្រលុះ ឃុំបុស្សលាវ ស្រុកចិត្របុរី ខេត្តក្រចេះ បណ្ដាលអោយអ្នកជិះម៉ូតូស្លាប់ភ្លាមៗនៅកន្លែងកើតហេតុ រីឯអ្នកបើកបររថយន្តបានរត់គេចខ្លួនបាត់ដោយសុវត្ថិភាព ។រាល់វត្ថុតាងត្រូវបានកម្លាំងប៉ុស្តិ៍រដ្ឋបាលបុស្សលាវនិងអធិការបានធ្វើការវាស់វែង និងប្រមូលយកទៅរក្សារទុកនៅអធិការដ្ឋាននគរបាលស្រុកចិត្របុរី ចំណែកសព្វត្រូវបានឪពុកម្តាយយកទៅធ្វើបុណ្យ នៅឯភូមិស្វាយចេក ឃុំកោះខ្ញែរ ស្រុកសំបូរ តាមប្រពៃណី។ គួរបញ្ជាក់ផងដែរថាសពជនរងគ្រោះមានឈ្មោះ ឃាន កន្និកា ភេទប្រុស អាយុ ២១ឆ្នាំ ត្រូវជាកូនប្រសារ និងឈ្មោះ យន ស្រីលាភ ភេទស្រី អាយុ ១៥ឆ្នាំ ត្រូវជាកូនបង្កើត រស់នៅភូមិស្វាយចេក ឃុំកោះខ្ញែរ ស្រុកសំបូរ ខេត្តក្រចេះ។បន្ទាប់ពីបានធ្វើបុណ្យរួចរាល់ លោក មៀច ពៅ និងអ្នកស្រី ខុន ស្រីណាត បានដាក់ពាក្យបណ្តឹងទៅអធិការដ្ឋាននគរបាលស្រុកចិត្របុរី ដើម្បីទាមទាររកយុត្តិធម៌និងដំណោះស្រាយជូនពួកគាត់ ប៉ុន្តែរហូតមកទល់ថ្ងៃទី២៨ ខែតុលា ឆ្នាំ២០២៥ បច្ចុប្បន្ននេះ ពុកគាត់នៅពុំទាន់បានពន្លឺយុត្តិធម៌នៅឡើយទេ។យោងតាមប្រសាសន៍ដ៏ថ្លៃថ្លារបស់ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ បានលើកឡើងថា រាល់ស្ថាប័នតុលាការគ្រប់រាជធានី-ខេត្ត ត្រូវពន្លឿនដំណោះស្រាយរឿងក្តីជួនប្រជាពលរដ្ឋ ឲ្យបានឆាប់រហ័ស តាមអ្វីដែលអាចធ្វើទៅបាន មិនត្រូវផ្អិបរឺអូសបន្លាយរឿងក្តីទុកនោះទេ នៅពេលគ្រោះថ្នាក់ចរាចរណ៍ ជនរងគ្រោះ គ្រួសារជនរងគ្រោះ មានបញ្ហាបាត់បង់ទៅហើយ ប៉ុន្តែបើគាត់រងគ្រោះក្នុងគ្រោះថ្នាក់ចរាចរណ៍ហើយ កុំឱ្យគាត់រងគ្រោះនៅក្នុងនីតិវិធីទៀត។ទោះបីជាយ៉ាងនេះក្តីគ្រួសារសពជនរងគ្រោះ ទទូចស្នើសុំដល់ថ្នាក់ដឹកនាំគ្រប់លំដាប់ថ្នាក់ ឯកឧត្តម គឺ ប៊ុណ្ណារ៉ា ព្រះរាជអាជ្ញាអយ្យការអមសាលាដំបូងខេត្តក្រចេះ ឯកឧត្តម វ៉ា ថន អភិបាលខេត្តក្រចេះ មេត្តាជួយពន្លឿន សុំណុំរឿងខាងលើនេះផងទាន ពិសេសគោរពស្នើសុំដល់ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ មេត្តាទានចាត់កម្លាំងក្រោមឱវាទធ្វើអធិការកិច្ច ត្រួតពិនិត្យសុំណុំរឿងករណីគ្រោះថ្នាក់ចរាចរណ៍ ដែលបានកើតឡើងអស់រយៈពេលជាង១០ខែមកហើយ រហូតមកទល់បច្ចុប្បន្នគ្រួសារជនរងគ្រោះពុំទាន់បានទទួលពន្លឺយុត្តិធម៌និងដំណោះស្រាយនៅឡើយទេ សូមអរគុណ៕
