ខេត្តកំពង់ស្ពឺ ÷ ឯកឧត្តម ជាម ច័ន្ទសោភ័ណ អភិបាលខេត្តកំពង់ស្ពឺ និងធ្វើលិខិតព្រមានដល់មន្រ្តីណា ដែលបណ្តែតបណ្តោយឱ្យមានបទល្មើសដឹកជញ្ជូនឈើខុសច្បាប់កើតមានជាលើកទី២ និងបានណែនាំឱ្យមន្រ្តីពាក់ព័ន្ធពង្រឹងកិច្ចការបង្រ្កាបបទល្មើសនេះឡើងវិញ។ការព្រមាននេះធ្វើឡើងនៅក្នុងកិច្ចប្រជុំសាមញ្ញលើកទី១៨ អាណត្តិទី៤ របស់ក្រុមប្រឹក្សាខេត្តកំពង់ស្ពឺ នាថ្ងៃទី១១ ខែវិច្ឆិកា ឆ្នាំ២០២៥ ដែលលោកបានលើកឡើងពីករណី ដែលសកម្មជនព្រៃឈើ លោកតាន់ គឹមសួរ ប្រធានសមាគមយុវជនស្រលាញ់ធម្មជាតិបានរកឃើញបទល្មើសដឹកជញ្ជូនឈើ ប៉ុន្តែពិបាកសុំកិច្ចសហការបង្រ្កាបពីមន្រ្តីជំនាញកាលពីសប្តាហ៍មុន។តាមរយៈវីដេអូឃ្លិបនៅលើបណ្តាញសង្គមរបស់លោក លោកអភិបាលខេត្តបានលើកឡើងថា ពាក់ព័ន្ធជាមួយនឹងបទល្មើសព្រៃឈើដែលទទួលបានពីការបង្ហោះនៅតាមបណ្តាញសង្គម លោកបានជំរាបជូនប្រធានមន្ទីរកសិកម្ម រុក្ខាប្រមាញ់ និងនេសាទ ក៏ដូចជា មន្ទីរបរិស្ថានខេត្ត ត្រូវតែធ្វើការសិក្សាឱ្យបានច្បាស់លាស់។លោកបញ្ជាក់ដូច្នេះថា៖«ចុះហេតុអីបានជាបុគ្គលម្នាក់ [តាន់ គឹមសួរ] គេលើកឡើងហើយបានយើងទៅធ្វើក្រោយគេ? ឥលូវនេះខ្ញុំបានឱ្យខាង មន្ទីរកសិកម្មសួរនាំទៅអ្នកដែលទទួលខុសត្រូវនៅតាមដងផ្លូវនេះ ហើយប្រសិនបើមានករណីកើតឡើងទៀត ប្រហែលជាយើងនឹងធ្វើជាលិខិតព្រមាន ហើយមិនឱ្យមានលើកទី២ទេ។លើសពីនេះ លោកអភិបាលក៏បានណែនាំដល់កងកម្លាំងនគរបាល អាវុធហត្ថ និងអាជ្ញាធរមូលដ្ឋានពាក់ព័ន្ធ ឱ្យពិនិត្យមើលបញ្ហានេះឡើងវិញ ដើម្បីចៀសវាងផលប៉ះពាល់អវិជ្ជមានដល់ថ្នាក់ដឹកនាំមូលដ្ឋាន និងថ្នាក់ជាតិ។លោកជាម ច័ន្ទសោភ័ណបានថ្លែងថា៖«ជួនកាលយើងទទួលព័ត៌មានថា ឃាត់បានឡានហ្នឹងហើយ ទាក់ទងជាមួយជំនាញ ជំនាញយើងមិនលើកទូរសព្ទលើកអីទៀតហ្នឹងមានន័យថាម៉េច? ហើយប្រសិនបើធ្វើអ៊ីចឹងមែន វាមិនត្រឹមតែប៉ះពាល់តែខាងបណ្តាកងកម្លាំងរបស់យើងនៅតាមដងផ្លូវទេ តែក៏ជះឥទ្ធិពលអាក្រក់មកដល់រដ្ឋបាលឯកភាពរបស់យើងដែរ»។លោកបន្តថា៖«មានន័យថាទាំងឯកឧត្តមប្រធានក្រុមប្រឹក្សាខេត្ត, ខ្ញុំអ្នកទទួលខុសត្រូវចំពោះមុខ ប្រមុខរាជរដ្ឋាភិបាល ក្រសួងមហាផ្ទៃផងដែរ ឬក៏ជាមួយឯឧត្តមប្រធានក្រុមការងាររាជរដ្ឋាភិបាលចុះមូលដ្ឋានរបស់យើង។ នេះមិនមែនជាការស្តីបន្ទោសទេ ប៉ុន្តែត្រូវតែពង្រឹងកិច្ចការងាររបស់យើងជាក់លាក់ច្បាស់លាស់»។គួររំលឹកផងដែរថា កាលពីយប់ថ្ងៃទី០៤ ខែវិច្ឆិកា ឆ្នាំ២០២៥ កន្លងទៅ លោកគឹមសួរបានឲ្យដឹងថា ឧក្រិដ្ឋកម្មព្រៃឈើនេះបានបំផ្លាញព្រៃឈើអស់រយៈពេលជាង២០ឆ្នាំមកហើយ។ ពួកគេបានធ្វើការបំផ្លាញប្រភេទឈើម្រេញ រាជកុល ពីតំបន់អភិរក្សសត្វព្រៃឱរ៉ាល់ ក្នុងខេត្តកំពង់ស្ពឺ ហើយដឹកជញ្ជូនឆ្លងកាត់ក្រុងច្បារមន ខេត្តកំពង់ស្ពឺ និងដឹកជញ្ជូនបន្តទៅកាន់រាជធានីភ្នំពេញ ដើម្បីនាំចេញទៅប្រទេសវៀតណាម។លោកបានអះអាងថា៖«ពាក់ព័ន្ធទៅនឹងសកម្មភាពខាងលើនេះ ខ្ញុំនិងក្រុមការងារបានតាមដានអស់រយៈពេលជាង១ឆ្នាំមកហើយ បានចំណាយពេលវេលា និងថវិកាផ្ទាល់ខ្លួនជាច្រើនផងដែរ។ ខ្ញុំមិនហត់ក្នុងការតាមដានបទល្មើសព្រៃឈើខាងលើនោះទេ តែខ្ញុំហត់ថា នៅពេលដែលតាមហើយ ស្នើសុំការសហការពីមន្ត្រីជំនាញដូចសុំភ្លើងយក្សអ៊ីចឹង…អត់ពិបាករកបទល្មើសព្រៃឈើនោះទេ តែពិបាករកមន្ត្រីមកសហការបង្ក្រាប»។កាលពីយប់ថ្ងៃទី៤ ខែវិច្ឆិកានេះ លោកគឹមសួរបានឃាត់រថយន្តកែច្នៃដឹកជញ្ជូនឈើប្រមាណជា៨កំណត់ធំៗ ក្នុងស្រុកឱរ៉ាល់ហើយបានទាក់ទងទៅមន្រ្តីជំនាញដើម្បីសុំសហការបង្រ្កាប។ ប៉ុន្តែលោកបានចាំអស់រយៈពេលជាង២ម៉ោង ក៏មិនទាន់ឃើញមានមន្រ្តីជំនាញណាចុះទៅនោះដែរ។លោកបាននិយាយក្នុងពេលនោះដូច្នេះថា៖«មកដល់ឥលូវនេះចូលជាង២ម៉ោងហើយ មិនទាន់ឃើញ មានមន្រ្តីជំនាញណាម្នាក់ចុះមកសហការនៅឡើយទេ។ នេះឆ្លុះបញ្ចាំងមូលហេតុបទល្មើសធនធានធម្មជាតិនៅតែបន្តកើតមាន ហើយកើតមានទៀត គឺដោយសារបែបលក្ខណៈអ៊ីចឹង។ នៅពេលដែលមានកម្លាំងពីខាងក្រៅចុះធ្វើការ បង្ហាញការខ្វាយខ្វល់ តែមន្ត្រីជំនាញ ដែលមានសមត្ថកិច្ចហាក់ដូចជា មិនសប្បាយចិត្តនៅក្នុងការចូលរួមសហការ ជាមួយគ្នាទាល់តែសោះ គឺស្ថិតនៅក្នុងស្រុកឱរ៉ាល់ ខេត្តកំពង់ស្ពឺតែម្តង»។ទោះយ៉ាងណា បទល្មើសនោះត្រូវបានបង្រ្កាប ក្រោយពីលោកបានស្នើសុំកិច្ចអន្តរាគមន៍ពីលោកសិន វិរៈ ព្រះរាជអាជ្ញាអមសាលាដំបូងខេត្តកំពង់ស្ពឺរួចមក។លោក តាន់ គឹមសួរ ក៏បានទាមទារឱ្យមានការធ្វើការកំណែទម្រេង់ដកមន្ត្រីមួយចំនួន និងរៀបចំរចនាសម្ព័ន្ធនៅខាងស្រុកឱរ៉ាល់ ឡើងវិញ ដើម្បីឱ្យកិច្ចខិតខំរបស់រាជរដ្ឋាភិបាលក្នុងការទប់ស្កាត់បទល្មើសធនធានធម្មជាតិមានប្រសិទ្ធភាពខ្ពស់។លោក តាន់ គឹមសួរ បានអះអាងថា ក្រុមឧក្រិដ្ឋជនអាចបង់ប្រាក់សំណូក ប្ដូរជាមួយការការពារ និងបន្តបំផ្លាញព្រៃឈើ។ ដូចនេះលោកបានទាមទារឱ្យមានការស៊ើបអង្កេតហិរញ្ញវត្ថុ ដូចជាការតាមដានប្រាក់ បង្កកទ្រព្យសម្បត្តិ និងចោទប្រកាន់អ្នកដែលទទួលបានអត្ថប្រយោជន៍ពីឧក្រិដ្ឋកម្មព្រៃឈើនេះ។ ក្នុងនោះរួមមានទាំងអ្នកជួញដូរឈើ និងមន្ត្រីដែលបានបិទភ្នែកបណ្តែតបណ្តោយឱ្យមានបទល្មើសកើតឡើង។លោក តាន់ គឹមសួរ ដដែលក៏បានអំពាវនាវសុំអន្តរាគមន៍ពីលោកនាយករដ្ឋមន្រ្តីហ៊ុន ម៉ាណែត, រដ្ឋមន្ត្រីក្រសួងបរិស្ថាន លោក អ៊ាង សុផល្លែត និងរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោកឌិត ទីណា ជាដើមផងដែរ។លោកបានលើកឡើងថា៖«ឧក្រិដ្ឋកម្មនេះមិនត្រឹមតែបំផ្លាញដើមឈើប៉ុណ្ណោះទេ វាថែមទាំងបំផ្លាញអនាគតរបស់យើងផងដែរ។ សូមឈរជាមួយគ្នា ដើម្បីបញ្ឈប់ការបំផ្លាញទ្រព្យសម្បត្តិជាតិរបស់យើងទៀត»។
