ខេត្តក្រចេះ ÷ ប្រិយមិត្តជាទីរាប់អាន! នៅព្រឹកថ្ងៃទី២៦ ខែវិច្ឆិកា ឆ្នាំ២០២៥រឿងរ៉ាវដ៏ភ្ញាក់ផ្អើលមួយបានកើតឡើងនៅក្នុងខេត្តក្រចេះនិងបានបន្តចែកចាយយ៉ាងព្រោងព្រាតតាមបណ្តាញសង្គម បន្ទាប់ពីបានឃើញគណនីហ្វេសប៊ុកផេកឈ្មោះ Tan kimsour បានបង្ហោះវីដេអូររៀបរាប់ពីសកម្មភាពកម្លាំងកងរាជអាវុធហត្ថខេត្តក្រចេះ ចុះមកសួររកលិខិតបញ្ជារបេសកកម្ម បន្ទាប់ពីលោកបានរាយការណ៍អំពីបទល្មើសធនធានធម្មជាតិ១ករណី ដែលបង្ករឡើងដោយមេឈ្មួញឈ្មោះ ធា នី ហៅ (ឃ្នី) និងបក្សពួកបាននិងកំពុងធ្វើសកម្មភាពចរាចរដឹកជញ្ជូនឈើដោយរថយន្តសាំយុងកែឆ្នៃ ក្បាលពណ៌ស ទ្រុងខ្មៅប្រវែង៧ម៉ែត្រផ្ទុកពេញដោយឈើ បើកចេញពីចំណុចភូមិរមួល កាត់តាមទន្សោងធ្លាក់ ឃុំកំពង់ចាម ស្រុកសំបូរ ខេត្តក្រចេះ សំដៅយកទៅលក់ចែកចាយតាមស្រង់និងដេប៉ូនានាទូទាំងខេត្ត។បន្ទាប់ពីបានប្រទះឃើញសកម្មភាពការដឹកជញ្ជូនឈើខាងលើភ្លាម ម៉ោង៥.១៨នាទីព្រឹក លោក តាន់ គីមសួរ និងក្រុមការងារបានទំនាក់ទំនងរាយការណ៍ទៅលោក បួយ រតនា នាយផ្នែករដ្ឋបាលព្រៃឈើព្រែកប្រសព្វ និងបានរាយការណ៍ទៅឯកឧត្តម វ៉ា ថន អភិបាលខេត្តក្រចេះ ដើម្បីសុំកិច្ចសហការទប់ស្កាត់ និងបង្ក្រាប ចាំអស់រយៈពេលជាច្រើនម៉ោងពុំឃើញមានជំនាញណាមកឡើយ លុះដល់ម៉ោង ៩.០០នាទីព្រឹក ក៏ឃើញមានកម្លាំងអាវុធហត្ថចំនូន០២នាក់ (អង្គភាពសន្តិសុខ ស្នាក់ការ៧១២) មកដល់ទីតាំងខាងលើ មិនទៅពិនិត្យរថយន្តដឹកឈើ បែរជាមកសួររកលិខិតបញ្ជាបេសកកម្មពីលោក តាន់ គីមសួរ និងក្រុមការងារទៅវិញ។យោងតាមការលើកឡើងពីកងកម្លាំងអាវុធហត្ថបានប្រាប់ថា ការសួររកលិខិតបញ្ជាបេសកកម្ម និងហៅទៅទីបញ្ជាការដ្ឋានកងរាជអាវុធហត្ថខេត្តក្រចេះ គឺពួកគាត់ធ្វើតាមបទបញ្ជាពីលោកឧត្តមសេនីយ៍ត្រី សាក់ សារាំង មេបញ្ជាការខេត្តតែប៉ុណ្ណោះ។ប្រជាពលរដ្ឋនិងមហាជនទូទាំងប្រទេសនាំគ្នាស្រឡាំងកាំង នឹកហួសចិត្តចំពោះលោក សាក់ សារាំង មេប៉េអឹមខេត្តក្រចេះ ខណៈបទល្មើសធនធានធម្មជាតិក្នុងដែនសមត្ថកិច្ចខ្លួនមិនព្រមបង្ក្រាប បែរជាសួររកលិខិតបេសកកម្មអ្នករាយការណ៍ទៅវិញ តើទង្វើនេះជាចេតនាអ្វីឲ្យប្រាកដទៅទាន? មួយអន្លើចំពោះករណីខាងលើនេះលោក តាន់ គីមសួរ នឹងក្រុមការងារបានរាយការណ៍ទៅជំនាញរដ្ឋបាលព្រៃឈើ និងលោកអភិបាលខេត្តទេ ម្តេចក៏លោក សាក់ សារាំង បញ្ជារឲ្យកូនចៅមកធ្វើសកម្មភាពបែបនេះទៅវិញ រឺមួយក៏លោក សាក់ រាំង និងក្រុមឈ្មួញមានការពាក់ព័ន្ធគ្នា? ទើបធ្វើបែបនេះ? យោងតាមប្រសាសន៍ដ៏ថ្លៃថ្លារបស់សម្ដេចអគ្គសេនាបតីតេជោ ហ៊ុន សែន ប្រធានព្រឹទ្ធសភានាពេលបច្ចុប្បន្ន លោកតែងតែលើកឡើងនឹងបានដាក់បទបញ្ជា ដ៏មុឹងម៉ាត់ដល់ដល់មន្ត្រីជំនាញពាក់ព័ន្ធ គ្រប់ស្ថាប័នគ្រប់លំដាប់ថ្នាក់ ត្រូវតែបង្ក្រាបរាល់បទល្មើសធនធានធម្មជាតិទាំងឡាយណា ដែលកើតមានក្នុងដែនសមត្ថកិច្ចខ្លួនគ្រប់គ្រង ឱ្យខានតែបានជាកំហិត។ទោះជាយ៉ាងនេះក្តីមហាជនទូទាំងប្រទេស រងចាំអ៊ុតមើល ថាតើឈ្មួញឈើដែលសកម្មក្នុងការចរាចរណ៍ដឹកជញ្ជូនផលអនុផលព្រៃឈើខាងលើនេះ ហ្នឹងអ្នកដែលពាក់ព័ន្ធអាចគេចផុតពីសំណាញ់ច្បាប់ដែរឬក៏យ៉ាងណា?
